ئاخفتنكه‌رێ سەرۆکاتیا کۆمارى یا تورکیا ل دۆر ئۆپراسیۆنێن له‌شكه‌رێ وەلاتێ خو ل چیایێ گارەی ل ناڤا سنۆرێن ھەرێما کوردستانێ ل دژی گەریلایێن پەکەکێ راگەھاند، ھەتا بنبرکرنا پەکەکێ ئۆپراسیۆنێن وان دێ دبەردەوام بن.
ئیبراھیم کالن، ئاخفتنكه‌رێ سەرۆکاتیا کۆماری یا تورکیا بۆ میدیایێن وەلاتێ خو راگەھاند، ئەو ب رێککەفتنا دناڤبەرا ھەولێرێ و بەغدا دا ل دۆر ئاساییکرنا رەوشا شنگالێ دلخۆش بوون، ئەو چه‌ند ژی پێنگاڤەکا گرنگ بوو بۆ نەھێلانا ترس و گەفان ل وان دەڤەران، به‌لێ رێککەفتن ب تنێ بەس نینە، ژبەرکو بەغدا و ھەولێر دزانن رەوش یا ئالۆزە و پێدڤی ب کارێ ھەڤپشک یێ زێدەتر ھەیە.
ئیبراھیم کالن دوپات کر کو چاڤێ تورکیا ل ئاخا عیراقێ نینە و گۆت: ئەگەر ژ وێ ئاخێ گەف ل سەر ئاسایشا وان نەھێنه کرن، تورکیا ژی ھێرشان ناکەت و پێدڤی ب ئۆپراسیۆنێن سەربازی ژی نابن.
ل دۆر ئۆپراسیۆنا چیایێ گارەی یا بەری دو رۆژان دەستپێکری کالنی گۆت: هه‌تا نوكه سێ سەربازێن وان د وێ ئۆپراسیۆنێ دا ھاتینە کوشتن، لەورا پێدڤییە بەردەوامیێ ب وێ ئۆپراسیۆنێ بدەن، بۆ ھێرشکرنا ل سەر شنگالێ ژی ئەو چاڤەرێ پیشھاتان دکەن، ئه‌گه‌ر گەف ل وێ دەڤەرێ ب دهوماهى نەھێن، ئۆپراسیۆنا ل سەر شنگالێ ژی بژاردەیەکا ڤەکریە.
