بو دویڤ چوونا رەوشا بریندارێن رویدانا تیرورستی ئەوا شڤێدی ل كەمپا قادیا هاتیە ئەنجامدان ئەڤرو ئێڤاری ب نوینەراتیا سەروكێ حكومەتا هەرێما كوردستانێ دكتور علی تەتەر پارێزگه‌رێ دهوكێ سەره‌دانا نەخوشخانا تەنگاڤیا ل دهۆكێ كر وژنێزیك سەحكرە رەوشا بریندارێن شڤێدی ئه‌وێن ژئەنجامێ رویدانا كەمپا قادیا بووینه قوربانى .
پارێزگه‌رێ دهۆكێ سلاڤێن مسرور بارزانی سەروكێ حكومەتا هەرێما كوردستانێ گەهاندنە كەس وكارێن برینداران وبەرهەڤیا خو نیشان دا بو هەر هاریكاریەكێ بو وێ یەكێ چارەسەریەكا باش بو ناڤبریان بهێتە كرن وداخازا سلامەتیێ بو كر.
لدویڤدا پارێزگه‌رێ دهۆكێ ودگەلدا خەلیل محمود قائیمقامێ سێمێلێ ورێڤەبەرا كوچ وكوچبەرا وبەرسڤدانا قەیرانا سەرا ماڵا شێخ حسن ل كەمپا قادیا دا كو ئێك ژبریندارێن رویدانێ بوو هەروەسا دوو نەڤیێن وی یێن زاروك ژی ژئەنجامێ پەقینێ شەهید بووینە .
دڤان سەرەداناندا پارێزگه‌رێ دهۆكێ سلاڤ وسەرەخوشیێن سەروكێ حكومەتا هەرێما كوردستانێ گەهاندنە شێخ حسن ومالباتێن بریندارا وگوت: ئەم شریكێن خەما هەوەینە وئەم ڤی كارێ هوڤانە روى رەش و شەرمزاردكەین وئەڤ كریارێن تیرورستی نەشێن مە ژرێباز كوردایەتی دویربێخن.
هەروەسا گوت: هەمى زەرەرمەند دێ هێنە قەرەبوكرن وچارەسەریا بریندارا ژی دێ هێتە كرن وساخ وسلامەتی بو هەمیان خواست.
