به‌رپرسه‌كێ بلندێ ئه‌مریكى كو ل گه‌ل سه‌رۆكێ وى وه‌لاتى سه‌ره‌دانا جنێڤێ كریه، به‌رى كۆمبوونا دناڤبه‌را سه‌رۆكێ ئه‌مریكا و سه‌رۆكێ روسیا ل دۆر پێشنیارا توركیا بۆ مانا هێزێن توركیا ل ئه‌ڤغانستانێ و پرسا سیسته‌مێ به‌ره‌ڤانیا ئێس 400 راگه‌هاند، د دیدارا بایدن و ئه‌ردووگانی دا بایدن ب ئاشكرا گۆتییه لایه‌نێ توركى كو پێدڤیه كێشه‌یا سیسته‌مێ ئێس 400 چاره‌سه‌ربكه‌ن، چونكى نابیت وه‌لاته‌كێ ئه‌ندامێ ناتۆیێ خودانا وى سیسته‌مى بیت.
ئه‌وى به‌رپرسێ ئه‌مریكا كو ناڤێ خۆ ئاشكرا نه‌كریه گۆتیه ژى، هه‌لوێستێ ئه‌مریكا به‌رامبه‌رى سیسته‌مێ به‌ره‌ڤانیا ئێس 400 نه‌گهۆره و ناهێته گهۆرین.
هه‌روه‌سا لدۆر ده‌نگ و باسێن وێ چه‌ندێ كو توركیا بۆ گهۆرینا هه‌لوێستێ ئه‌مریكا به‌رامبه‌ر پرسا سیسته‌مێ به‌ره‌ڤانیا ئێس 400 داخاز ژ ئه‌مریكا كریه كو هێزێن توركیا ل ئه‌فغانستانێ بمینن و ئاسایشا فرۆكخانه‌یا كابل ب پارێزن، راگه‌هاند، ئه‌و دوو پرسێن ژێك جودانه، ئه‌گه‌ر مه‌ره‌ما توركیا نه‌رمكرنا هه‌لوێستێ ئه‌مریكا بیت، ئه‌و سه‌ركه‌فتى نائینیت، چونكى پرسا ئه‌فغانستانێ پرسه‌كا جودایه و پرسا ئێس 400 ژى پرسه‌كا تایبه‌ته ب ئاسایش و ئێمناهییا وه‌لاتێن ئه‌ندامێن ناتۆیی، له‌وا نه ئه‌مریكا و نه وه‌لاتێن دى یێن ئه‌ندامێن ناتۆیێ نه‌شێن بێ ده‌نگییێ نیشان بده‌ن كو وه‌لاته‌كێ هه‌ڤپه‌یمان خو‌دان سیسته‌مه‌كێ به‌ره‌ڤانیێ یێ جودا بیت
