رۆژنامەڤانەکێ تورک یێ نێزیکی بازنەیا بریارێ د حکومەتا تورکیا دا و تایبەتمەند ب کاروبارێن رۆژھەلاتا ناڤین و سەرۆکێ مالا رۆژنامەڤانێن عەرەب ل تورکیا راگەھاند، بەشار ئەسەد، سەرۆکێ رژێما سوریا د چەند رۆژێن بھێن دا دێ پەنایێ بەتە ئیرانێ، کو وەلاتێ ئێکانەیە ل سەر پێشوازیکرنا وی رازی بووی، پشتی ئەو دەستبەردانا خو ژ دەستھەلاتێ ب رێكا گۆتارەکا تێلەڤزیۆنی یا راستەوخۆ رادگەھینیت.
تۆران قشلاکچی، رۆژنامەڤانێ تورک راگەھاند، د دەمێ دوو حەفتیێن بھێت دا بەشار ئەسەد دێ دەست ژ دەستھەلاتێ بەردەت و ئەو و بنەمالا خو دێ چنە تەھرانێ، ژبەرکو ئیران وەلاتێ ئێکانەیە رازی بووی مافێ پەنابەریێ بدەتێ، ئەو ژی پشتی دەستبەردانا خو ژ دەستھەلاتێ ب رێیا گۆتارەکا تێلەڤزیۆنی رادگەھینیت.
قشلاکچی گۆت ژی: تورکیا و رۆسیا دێ ب ھێزتر ل سوریا بەرھەڤ بن و ھەردو وەلات ل سەر رێکخستنا کاروباران و پاراستنا سڤیلان و راگرتنا رەوشا ئیمناهیێ ل سوریا ریککەفتینە، بۆ وێ یەکێ دەولەت ژ ناڤ نەچیت.
ل دویڤ گۆتنا قشلاکچی، رەجەب تەیب ئەردۆغان، سەرۆک کۆمارێ تورکیا داخوازا ئاسانکارییان ژ رۆسیا کرییە، بەلێ جۆرێ ئاسانکارییان ئاشکرا نەکر، لێ ئەو داخوازی بۆ وێ چەندێ یە شەرێ ناڤخو ل سوریا روی نەدەت کو ھندەک لایەن کار بۆ دکەن.
ژ لایەکێ دی ڤە رۆژنامەیا سەباح یا تورکی ژی ئاشکرا کرییە، دەمەکێ نێزیک بەشار ئەسەد دێ دەست ژ دەستھەلاتێ بەردەت.
