ئەندامەکێ جڤاتا پارێزگەھا دھۆکێ ئاشکراکر کو ھاتنا گازا سپی ژ بەغدا بۆ دھۆکێ پار و ئەڤسالە گەلەک کێم بوویە، دھۆکێ پێدڤی ب ٥٥ ملیۆن لترێن گازا سپی یە ھەتا ھەر خێزانەکێ ٢٠٠ لترێن گازا سپی دگەھنێ.
عەبدو لسەمەد کۆچەر، سەرۆکێ لیژنا سامانێن سروشتی و پیشەسازی ل جڤاتا پارێزگەھا دھۆکێ ئاشکراکر، ئەڤسالە حکومەتا عیراقێ رێژەکا گەلەک کێم ژ گازا سپی بۆ پارێزگەھا دھۆکێ ھنارتیە و گەلەک ب سستی یا دھێتە بەلاڤکرن، ژبەرکو گازا سپی نینە و ھەر چ دھێت ھەر ھەمان رۆژ یا ل سەر خەلکی دھێتە بەلاڤەکرن.
عەبدو لسەمەد کۆچەر گۆت: پار حکومەتا عیراقێ نێزیکی ھەشت ملیۆن و نیڤ لترێن گازا سپی بۆ پارێزگەھا دھۆک ھنارتن و ھەرێمێ ژی ١٠ ملیۆن دا بوون، ب وێ یەکێ ١٨ ملیۆن لتر ھاتە بەلاڤەکرن، ئەڤسالە حکومەتا عیراقێ حەفت ملیۆن ٩٠٠ ھزار لتر ھنارتینە، بەرامبەر دھۆکێ پێدڤی ب ٥٥ ملیۆن لترێن گازا سپی یە ھەکە ھەر مالەکێ ٢٠٠ لتر بگەھنێ، ئەڤە ژبلی ئاوارە و فەرمانگەھێن حکومەتێ و جھێن دی.
عەبدو لسەمەد گۆت ژی: سالانە حکومەتا عیراقێ ھەر پارێزگەھەکێ ١٥ ملیۆن لترێن گازا سپی ددانێ بەلێ ھەر دو پارێزگەھێن ھەولێر و سلێمانیێ قەبویل نەکر ب بھانا وێ چەندێ کو رێژا وا ژ دھۆک زێدەترە، ئەڤسالە و پار ل دویڤ رێژا ئاکنجیبوونێ گاز دا خەلکێ دھۆکێ و رێژا زێدەتر گەھشتە ھەولێرێ و ھێشتا زێدەتر گەھشتیە سلێمانیێ ژبەرکو ھەلەبجە ژی ل گەل دایە.
