بریارده‌رێ لیژنا دارایی ل جڤاتا نوینه‌رێن عیراقێ راگه‌هاند، بهایێ به‌رمیله‌كا په‌ترۆلا خاڤ د پرۆژه‌قانوونا بودجا 2021ێ دا 45 دولار بۆ هه‌ر به‌رمیله‌كی هاتیه دانان.
ئەحمەد سەفار، بریارده‌رێ لیژنا دارایی د جڤاتا نوینه‌رێن عیراقێ ئاماژه ب هندێ كر، سه‌رجه‌مێ گشتیێ خه‌رجیان د پرۆژه‌قانوونا بودجێ دا ژ 164 ترلیۆن دیناران بۆ 130 ترلیۆن دیناران كێمكریه.
وى ئه‌ندامێ لیژنا دارایی ئاماژه ب هندێ كر كو بۆ ده‌مێ دو حه‌فتیان رۆژانه لیژنه ب به‌رده‌وامی كۆمبوونان دكه‌ت، ب ره‌نگه‌‌كی خواندنا ئێكێ بۆ سه‌رجه‌م بابه‌ت و برگێن پرۆژه‌ى هاتینه كرن و نوكه د خواندنا دوماهیێ دانه.
ئەحمەد سەفار دیار ژی كر، لیژنێ د ماددێ 12 دا گۆهورینێن به‌رچاڤ كرینه، هه‌روه‌سا پێشنیار هه‌نه بهایێ به‌رمیلا په‌ترۆلێ ژ 42دولارا بۆ 45 دۆلارا بهێته زێده‌كرن بۆ هندێ داهاتێ گشتی زێده ببیت، هه‌روه‌سا كورتئینان ژی بۆ كێمتر ژ 30 ترلیۆن دیناران كێم بكه‌ن.
راگه‌هاند ژی، چه‌ندین برگێن دی ژی ماینه هه‌لاویستی د رۆژێن بهێت دا دێ گه‌نگه‌شێ ل سه‌ر كه‌ن، ب تایبه‌ت ئه‌وا پێدڤی ب كێمكرن و گۆهورینێن د پلێن فه‌رمانبه‌ران دا هه‌روه‌سا پشكا هه‌رێما كوردستانێ.
