ئاخفتنكه‌رێ پارتی دیموكراتی كوردستان راگه‌هاندنه‌ك لدور رویدانا دوهى یا باژێرێ هه‌ولێرێ به‌لاڤكر و ئه‌ڤه ده‌قێ وێ یه:
گروپه‌كێ رێ لادایى و ده‌ركه‌فتی ژ قانوونێ، ل بن سیبه‌را حەشدا شه‌عبی و ب ئیمكانات و ئیمتیازات و پشته‌ڤانیا وان، ل ده‌مژمێر ٩:٣٠ى شڤێدى، ب مه‌ره‌ما تێكدانا سەقامگیری و ئاسایش و ئێمناهیا پایتەختێ هەرێما كوردستانێ، ترسنۆكانە چەند موشەكه‌ك ئاراستەیی ناڤ باژێرێ هەولێرێ كرینه، كو بوویە ئه‌گه‌رێ زیانێن مرۆڤی و مادی، و دلگرانكرنا ئاكنجیێن سڤیل یێن هەولێرا هۆلاكۆ بەزین.
ئه‌م وه‌كو پارتی دیموكراتى كوردستانێ، زێده‌بارى ئیدانەکرنا وێ كریارا تیرۆرستی یا پیس و چه‌په‌ل، داخوازێ ژ حكومەتا فیدرالی یا ئیراق و هه‌ڤپەیمانییا دەولەتی و ب تایبه‌تی ئەمریكا دكەین، زێده‌بارى ئیدانەكرنا ڤێ كریارا دوژمنكارانە ب له‌ز ڤه‌كۆلین و دویڤچوونێ بکەن و لایەنێ بەرپرسیار ل دویڤ قانوونێ بگه‌هیته سزایێ خو یێ پێدڤی، ب مخابنی ڤه ئەڤ كریارە بۆ چەندەمین جاران دوبارە دبن و ژ ئه‌نجامێ نه‌گه‌هاندنا سزایێ وان، تاقمێن تێکدەر جورئەتا هندێ پەیدا دكەن ل سەر كارێن تیرۆریستی بەردەوام بن.
یا ڤه‌شارتی نینه و ب ئاشكرایى دزانین کو عەقلیەتا ڤی تاقمێ فاشست و دویر ژ هزرا سەردەمیانە، چاڤێ وان پێشكەفتن و ئارامی و ژیانا ئاكنجیێن هەرێما كوردستانێ رانابیت، وان نه‌ڤێت پێكڤە ژیانا نەتەوەیی و ئاینی ل كوردستانێ هەبیت.
هەمى لایەكى ئاگه‌هدار دكەین کو بەردەوامیدان ب ڤی ره‌نگێ سه‌ره‌ده‌ریكرنێ د گەل هەرێما كوردستانێ ب گشتی و هەولێرا پایتەخت ب تایبەتی، ده‌رئه‌نجامێن باش نابن
زێده‌بارى پشته‌ڤانییا مه یا ته‌مام بۆ حكومەتا هەرێما كوردستانێ و هه‌مى سازی و دەزگه‌هێن به‌ره‌ڤانى و ئێمناهیێ، ئه‌م رادگەهینین كو هه‌مى سەركردایەتی و كادر و ئەندامێن مه بۆ پاراستنا قەوارێ هەرێما كوردستانێ و پایتەختێ هەرێمێ وەك چاوا ل ده‌مێ بوری دا شورها پیلایی بووین، ژ نوكه وێڤه ژى ل سەر هەمان رێباز و باوەڕ دێ پارێزگاریێ ژ قەوارێ ھەرێما کوردستانێ و حكومەتێ و ئاكنجیێن وی كەین.
مەحمود محەمەد
ئاخفتنكه‌رێ پارتى دیموكراتى كوردستان
شازده‌یى شواتا دوهزار و بیست وئێكێ
