هه‌ردوو مه‌كته‌بێن سیاسى یێن پارتى و ئێكه‌تیێ راگه‌هاندنه‌كا هه‌ڤپشك به‌لاڤكر

د كومبوونا هه‌ردوو مه‌كته‌بێن سیاسى یێن پارتى دیموكراتى كوردستان و ئێكه‌تى نیشتیمانى كوردستان دا لسه‌ر چه‌ندین بنه‌مایێن بنه‌ره‌تى بو چاره‌سه‌ر و داخوازیێن خه‌لكێ كوردستانێ و پاراستنا ئه‌زموونا هه‌رێما كوردستانێ درژد بوون و راگه‌هاندنه‌ك به‌لاڤكر ئه‌ڤه‌ ژى راگه‌هاندنێ یه‌:ئه‌ڤرو پارتى دیموكراتى كوردستان و ئێكه‌تى نیشتیمانى كوردستان كومبوون. د كومبوونێ دا هه‌ردوو لایان پێروزباهیێن گه‌رم پێشكێشى خه‌لكێ كوردستانێ و پێشمه‌رگێن قه‌هره‌مان و بنه‌مالێن سه‌ربلندێن شه‌هیدان كرن ب هه‌لكه‌فتنا سه‌رهه‌لدانا مه‌زنا خه‌لكێ كوردستانێ و هه‌لكه‌فت و بیره‌وه‌رى و سه‌ركه‌فتنێن هه‌یڤا ئادارێ.هه‌روه‌سا بڤێ هه‌لكه‌فتێ رێكه‌فتناما خیانه‌تكارا ئادار سالا هزار و نه‌ه سه‌د و حه‌فتێ و پێنجێ دناڤبه‌را شاهێ ئێرانێ و سه‌دام كو پلانه‌كا بترس بوو ل دژى گه‌لێ مه‌ شه‌رمزاركر. كومبوونێ ئه‌و سه‌ركه‌فتن و كاره‌سات وه‌ك پشته‌ڤانه‌ك ل قه‌له‌م دان بو زێده‌تر پاراستنا ئه‌زموون و ده‌ستكه‌فتێن گه‌لێ مه‌ و توندتر راوه‌ستیان به‌رامبه‌ر دوژمنێن گه‌لێ مه‌ بتایبه‌تى تیرورستێن داعش كو دژى بهایێن ژیان و مروڤایه‌تیێ نه‌.هه‌روه‌سا هه‌ردوو لایان پیروزباهى و سوپاسى پێشكێشى هێزێن پێشمه‌رگێن قه‌هره‌مان كرن كو ب زیره‌كانه‌ شیان تیرورستێن داعش بشكێنن و هێرشێن وان ژناڤ ببه‌ن. پشكدارێن كومبوونێ سه‌رێ رێزێ بو گیانێ پاقژێ شه‌هیدێن شه‌رێ تیرورێ و هه‌مى ئه‌و شه‌هیدێن لسه‌ر رێكا ئازادیا كوردستانێ شه‌هیدبوین چه‌ماند. دكومبوونێ دا به‌حسێ قه‌یرانا دارایى یا هه‌رێما كوردستانێ و لسه‌ر هه‌میان قه‌یرانا سیاسى و چاره‌سه‌ركرنا قه‌یرانا سیاسى یا هه‌رێما كوردستانێ ب بنیاته‌ك زانى بو بده‌ستڤه‌ئینانا ئێك هه‌لویستى د چاره‌سه‌ركرنا قه‌یرانا ئابوورى و ئیدارى و ئه‌منى دا.د كومبوونێ دا هه‌ردوولا لسه‌ر چه‌ندین بنه‌مایێن بنه‌ره‌تى بو چاره‌س و لدویڤ چوونا داخوازیێن خه‌لكێ كوردستانێ و پاراستنا ئه‌زموونا هه‌رێما كوردستانێ درژد بوون و زێده‌بارى هه‌بوونا هنده‌ك جوداهیان د بیروبوچوونان دا، دووپاتى لسه‌ر هه‌ڤپه‌یمانى و هه‌ماهه‌نگیێ دناڤبه‌را پارتى و ئێكه‌تى و پارتێن دى دا كر و لسه‌ر وان بنه‌مایان بریار ژى دا كو بو ئه‌كتیف كرنا هه‌مى وان خالێن به‌حس لێ كرى به‌رنامه‌ و رێكێن چاره‌سه‌ریێ بو دابنن و ب هاریكاریا هه‌مى لایه‌كێ و ب ئێك هه‌لویستى پێنگاڤێن كردارى بێنه‌ هاڤێتن بو ئاسایكرنا ره‌وشێ و ئه‌كتیفكرنا په‌رله‌مانێ كوردستانێ و موكوم كرنا كار و بارێن حكومى یێن حكومه‌تا هه‌رێما كوردستانێ.

2016-03-06
1904