بهه‌لكه‌فتا بورینا بیست و پێنج سالیا ل سه‌ر سه‌رهلدانا گه‌لێ كوردستانێ یا بوهارا سالا هزار و نه‌هسه‌د و نوت و ئێكێ مه‌كته‌با سیاسى یا پارتى دیموكراتى كوردستان به‌یاننامه‌ك راگه‌هاند و دلایه‌كێ به‌یاننامێ دا هاتیه‌:
ئه‌ڤرو یادا سه‌رهلدانا پیروز یا گه‌لێ خو دكه‌ین كوردستان و ئه‌زمونا وێ چه‌ندین قوناغێن ب زه‌حمه‌ت برینه‌ و كورد دپێگه‌هه‌كێ نه‌ته‌وه‌یى یێ سه‌نگین و بهێزدایه‌ و ل ئاستێ وه‌رچه‌رخانه‌كا مه‌زن و هه‌لوه‌شیان و دوباره‌ نه‌خشه‌كێشانا ده‌ڤه‌رێ دایه‌ و ل هه‌ر ده‌مه‌كى دى نێزیكترین ژ ب ده‌ستڤه‌ئینانا هیڤیا مه‌زنا مه‌ كو مافێ چاره‌نڤیس و سه‌ربه‌خوییا ئێكجارى یه‌.
هه‌ر له‌وما ژ هه‌ر ده‌مه‌كێ دى زێده‌تر ته‌حه‌دى و گه‌ف و پیلان روى ب روى ئه‌زمونا مه‌ دبن و ب چه‌ندین شێوازان دڤێت ئیرادا مه‌ بشكێنن و لڤێ دوماهى قوناغێ دا مه‌ ژ داخوزایێن مه‌ یێن ره‌وا پاشڤه‌بزڤرینن، شه‌رێ تیرورستێن داعش و دورپێچ و سیاسه‌تا برسیكرن و دروستكرنا ته‌فره‌قا نافخویى و تێكدانا رێزێن هێزێن سیاسى و و شه‌ر فروتن ب دام و ده‌زگه‌هێن سه‌روه‌ریێن كوردستانێ و قه‌یران خولقاندن و گه‌فێن تێكدانا ئه‌منیه‌ت و ئاشتى یا نافخویى و ره‌وشا سیاسى ژ رواله‌لتێن وێ ته‌حه‌دیێ و شه‌رانگێزیێ نه‌  كو بتنێ دژى ئیرادا سه‌ربه‌خو خوزایى یا ملله‌تێ مه‌یه‌ و بو رێگریكرنێ یه‌ ژ بده‌سڤه‌ئینانا وان خواست و مافێن ره‌وا.
گه‌ل و پێشمه‌رگێ كوردستانێ ب شاهیدیا دوست و دوژمنان زێده‌بارى هه‌مى ئاسته‌نگ و پیلانان شیاینه‌ خوراگرانه‌ كوردستانێ ب پارێزن و تیرورستێن داعش تێك بشكێنن و ئه‌وێن شه‌رتانێ ل سه‌ر تیرورستێن داعش كرى و دیاریا خو دا خوساره‌ت بوون نوكه‌ دڤێت ب شێوازه‌كێ دى و ل نافخو دا كوردستانێ ژى تێك بده‌ن و ب قه‌یران و ئاریشێن نافخویى ڤه‌ مژویل بكه‌ن، هه‌تا كو ده‌رفه‌ته‌كا دیروكى ژ ده‌ست بچیت و نه‌گه‌هینه‌ دیاركرنا چاره‌نڤیسێ خۆ و ل گوهرانكاریى و هه‌ولوه‌شیانا هاوكێشه‌ و نه‌خشێ ده‌ڤه‌رێ دا ده‌ست به‌تال ده‌ربچین.