ئه‌ڤرو نێچیرڤان بارزانى سه‌روك وه‌زیرێن هه‌رێما كوردستانێ پێشوازیا خاتوین ریتا ئیزساك, بریارده‌را تایبه‌تا پرسا كێم نه‌ته‌وه‌یا د رێكخراوا مافێن مروڤى دا یا سه‌ر ب نه‌ته‌وێن ئێكگرتى و شاندێ دگه‌ل دا كر .
د دیداره‌كێ خاتوین ریتا دلخوشیا خو ب سه‌ره‌دانا هه‌رێما كوردستانێ و بزاڤ و پێنگاڤێن خه‌لك و حكومه‌تا هه‌رێما كوردستانێ بو پاراستنا مافێن مروڤى و پێشوازیكرن و خزمه‌تكرنا هژماره‌كا مه‌زن یا ئاواره‌ و په‌نابه‌ران ده‌ربرى و هه‌بوونا كه‌لتورێ پێكڤه‌ژیان و لێبوورینێ دناڤبه‌را پێكهاتێن جودا یێن كومه‌لگه‌ها كوردستانى دا بلند سه‌نگاندن .
هه‌روه‌سا دیار كر كو دێ سه‌ره‌دانا چه‌ندین ده‌ڤه‌رێن هه‌رێما كوردستانێ كه‌ن ب تایبه‌ت كه‌مپێن ئاواره‌ و په‌نابه‌ران بو وێ چه‌ندێ ژ نێزیك ئاگه‌هدارى ره‌وشا ژین و ژیارا وان بن و راپورته‌كێ ل سه‌ر ره‌وشا مافێن مروڤى ل هه‌رێما كوردستانێ ئاماده‌بكه‌ن .
ژلایێ خوڤه‌ سه‌روك وه‌زیرێن هه‌رێما كوردستانێ سوپاسیا سه‌ره‌دانا ناڤبریێ كر و ئاشكرا كر كو زێده‌بارى بارێ گرانێ دارایى, به‌لێ خه‌لك و حكومه‌تا هه‌رێما كوردستانێ پێشوازیا زێده‌تر ژ ملیونه‌ك و هه‌شت سه‌د هزار په‌نابه‌ر و ئاواره‌یان كریه‌ و جهێ ڤه‌حه‌واندن و خزمه‌تگوزاریێ بو دابینكریه‌ و هیڤى خواست جڤاكێ ده‌وله‌تى دڤى بیاڤى دا هاریكاریا زێده‌تر یا هه‌رێما كوردستانێ بكه‌ت بو سڤككرنا ڤى بارێ گران ب تایبه‌ت بو زێده‌تر هاریكاریكرنا ئاواره‌ و په‌نابه‌ران .
د پشكه‌كا دى یا په‌یڤێن خودا سه‌روك وه‌زیرێن هه‌رێما كوردستانێ به‌حسێ دیروكا دویر و درێژا كه‌لتورێ پێكڤه‌ژیانێ دناڤبه‌را پێكهاتێن جودا یێن كوردستانێ دا كر و دووپاتكر كو خه‌لك و حكومه‌تا كوردستانێ ب هه‌مى پێكهاتێن خوڤه‌ شانازیێ ب ڤى كه‌لتورى دبه‌ن و حكومه‌تا هه‌رێما كوردستانێ د خورتكرنا ڤى كه‌لتورى دا دێ به‌ردوام بیت و قانونێن هه‌رێمێ ب هه‌مى ره‌نگان پشته‌ڤانیێ ل ڤان پێنگاڤان دكه‌ن هه‌روه‌سا ته‌ئیكد كر كو ڤى كه‌لتورى دێ ره‌نگڤه‌دانه‌كا باشتر و زێده‌تر د دستورێ داهاتى یێ هه‌رێما كوردستانێ دا هه‌بیت .