ێڤی
نێچیرڤان بارزانى : ئه‌م پێگیرى رێكارێن چاكسازیێ نه‌

ئه‌ڤرو نێچیرڤان بارزانى سه‌روكێ حكومه‌تا هه‌رێما كوردستانێ پێشوازى ل بالیوز پاتریك سیمونى بالیوزێ ئێكه‌تیا ئه‌وروپا ل عیراقێ و شانده‌كێ دگه‌لدا كر ، كو ژ جێگرێ بالیوزى و به‌رپرسێ نڤیسینگه‌ها ئێكه‌تیا ئه‌وروپا ل هه‌ولێرێ پێكهاتبوون.د دیدارێ دا سیمونى خوشحالیا خو ب سه‌ره‌دانا هه‌رێما كوردستانێ و ئاستێ په‌یوه‌ندیێن دناڤبه‌را هه‌رێما كوردستانێ و ئێكه‌تیا ئه‌وروپا ده‌ربرى، و سوپاسیا حكومه‌تا هه‌رێما كوردستانێ كر بو هاریكارى و هه‌ماهه‌نگیا وان دگه‌ل مه‌دا، دووپاتى ژى لسه‌ر په‌یاما پشته‌ڤانى یا ئێكه‌تیا ئه‌وروپا بو هه‌رێما كوردستانێ كر و كورتیه‌ك ژى سه‌باره‌ت ئه‌رك و چالاكیێن هنارتیێ ئه‌وروپا ل هه‌رێما كوردستانێ و عیراقێ به‌حسكر.هه‌روه‌سا ئاماژه‌ ب وێ چه‌ندێ دا كو ژ نێزیك ڤه‌ ئاگه‌هدارێ ره‌وشا هه‌رێما كوردستانێ نه‌ و په‌سنا رولێ خه‌لك و حكومه‌ت و هێزێن پێشمه‌رگه‌ى كر د روى ب روى بوونا تیرورستێن داعش و حه‌واندنا هژماره‌كا ئێكجار مه‌زن ژ ئاواره‌ و په‌نابه‌ران .ژلایێ خوڤه‌ نێچیرڤان بارزانى سه‌روكێ حكومه‌تا هه‌رێما كوردستانێ پیروزباهیا ده‌ستبكاربوونێ ل بالیوزێ ئێكه‌تیا ئه‌وروپا ل عیراقێ كر و هیڤیا سه‌ركه‌فتنێ بو خواست، ئاماده‌یا حكومه‌تا هه‌رێمێ ژى بو هه‌ر هاریكاریه‌كێ نیشان دا. پاشى نێچیرڤان بارزانى كورتیه‌ك لسه‌ر ره‌وشا هه‌رێما كوردستانێ ب تایبه‌تى ئه‌و ته‌حه‌دیێن روى ب روى هه‌رێمێ بووین به‌حسكر، ژ وان ژى برینا پشكا بودجێ هه‌رێما كوردستانێ ژلایێ به‌غدا ڤه‌ ، وشه‌رێ تیرورستێن داعش و هاتنا هژماره‌كا مه‌زن ژ ئاواره‌ و په‌نابه‌ران بو هه‌رێما كوردستانێ و نزمبوونا بهایێ نه‌فتێ كو هه‌میان كارتێكرنه‌كا مه‌زن لسه‌ر ره‌وشا هه‌رێما كوردستانێ هه‌بوو.نێچیرڤان بارزانى هه‌روه‌سا ئاماژه‌ ب پێگیریا حكومه‌تا هه‌رێمێ ب وان رێك و چاكسازیان كر كو بو ده‌ربازبوون ژ قه‌یرانا دارایى داناینه‌، و بو ڤێ چه‌ندێ ژى حكومه‌تا هه‌رێمێ هیڤیێ دخوازین جڤاكێ ده‌وله‌تى ب گشتى و دوست و هه‌ڤپه‌یمان بتایبه‌تى هاریكاریا هه‌رێما كوردستانێ بكه‌ن و باشتر سه‌حكه‌نه‌ ره‌وشا هه‌رێما كوردستانێ.د پشكه‌كا دى یا ئاخفتنێن خودا نێچیرڤان بارزانى به‌حسێ كێشێن هه‌لاویستى یێن دناڤبه‌را هه‌ولێر و به‌غدا كر و دووپاتى ل وێ چه‌ندێ كر ئه‌گه‌ر به‌غدا نیازا راسته‌قینه‌ بو چاره‌سه‌ركرنا كێشان هه‌بیت، حكومه‌تا هه‌رێما كوردستانێ باوه‌ریه‌كا تمام ب وێ چه‌ندێ یا هه‌ى كو برێكا دیالوكێ چاره‌سه‌ریێ بو هه‌مى كێشان ببینین، بتایبه‌تى دڤان كاودانان دا كو هه‌ردوولا روى ب روى قه‌یرانا دارایى بوینه‌، دووپاتى ل وێ چه‌ندێ ژى كر كو پێدڤییه‌ جڤاكێ ده‌وله‌تى پشكا هه‌رێما كوردستانێ ژ وان قه‌ران دابین بكه‌ت كو دێ ده‌ته‌ حكومه‌تا عیراقێ.

2016-02-29
1847
ی
ڤ ی یێ 07504934005
Copyright Duhok TV 1992 - 2014, All rights Reserved. Developed by: Galwan Khalid