ئەڤرۆ جڤاتا وەزیرێن ھەرێما کوردستانێ ب سەرۆکاتیا مەسرور بارزانی سەورکێ حکومەتا ھەرێمێ و ئامادەبوونا قوباد تالەبانی جێگرێ سەرۆک وەزیران کومبوو.
ل دەستپێکا کۆمبوونێ سەرۆکێ جڤاتا وەزیران پەسنا رۆل و بزاڤێن شاندێ دانوستاندکارێ حوکمەتا ھەرێما کوردستانێ د گەل حکومەتا فیدرالی کر، کو بۆ دەمێ دوو حەفتیا ل بەغدا بوون و چەندین دیدار و ھەڤدیتن د گەل بەرپرسێن پله بلندێن حوکمەتا ئیراقێ کرن.
سەرۆک وەزیرێن ھەرێمێ مەسرور بارزانی ئاماژه دا وێ چهندێ کو حکومەتا ھەرێما کوردستانێ چ بھانە بۆ حکومەتا ئیراقێ نەھێلاینە و د چارچوڤێ دستووری دا ھەمی پێگیریێن خۆ بجھیئیناینە، سەخمەراتی چارەکرنا کێشێن گشتی و رێککەفتنەکا دادپەروەرانە کو ماف و شایستێن دارایی یێن ھەرێما کوردستانێ بھێنە دابینکرن.
مەسرور بارزانی ھەروەسا دوپاتکر، ھیچ رۆژەکێ دەستبەرداری مافێن دستووری یێن ھەرێمێ نابین و گۆت: ب مخابنی ڤە بابەتێ مووچە و شایستێن دارایی یێن کرینە کارەتەکا گڤاشتنا سیاسی دژی خەلکێ ھەرێما کوردستانێ.
سەرۆکێ جڤاتا وەزیرێن ھەرێما کوردستانێ داخاز كر كو نەتەوەیێن ئێکگرتی وەک لایەنێ سێ یێ پشکدار ببیت د وان دانوستاندنێن د ناڤبەرا حکومەتا ھەرێما کوردستانێ و حوکمەتا بەغدا دا دھێنە کرن، بۆ ھندێ ماف و ئەرکێن ھەر لایهنهكى بھێنە دیار کرن.
ژلایێ خۆڤە شاندێ دانوستانکارێ ھەرێما کوردستانێ دەرئەنجامێ سەرەدانا خو بۆ بەغدا ئێخستنە بەرچاڤ و ڕاگەھاندن، ئهگهرێ سەرەدانا وان بۆ بدەستڤەئینانا شایستێن دارایی یێن خەلکێ ھەرێما کوردستانێ و مووچەخۆران بوو.
زێدەباری وێ چەندێ بەحسێ چەوانیا رێککەفتنێ ل سەر پشکا ھەرێما کوردستانێ د پرۆە قانوونا بودجا سالا ٢٠٢١ ھاتە کرن، کو ژ لایێ جڤاتا وەزیرێن ئیراقێ ڤە ھاتیە پەسەند کرن.
شاندێ ھەرێما کوردستانێ دووپاتکر سەرەدانا وان بۆ بەغدا ب مەرەما بجھئینانا قانوونا پڕکرنا کورتئینانا بودجا سێ ھەیڤێن دووماھیا سالا ٢٠٢٠ بوویە، ھەروەسا دیارکرن ھەمی مەرجێن لسەر ھەرێما کوردستانێ ھاتینە بجھئینان و ھیچ بھانەک بۆ نەھنارتنا بەھرا ھەرێما کوردستانێ ژ بودجا گشتی یا ئیراقێ نەماینە.
لەوڕا جڤاتا وەزیرێن ھەرێما کوردستانێ دووپاتکر کو پێدڤیە حکومەتا فیدرالا ئیراقێ ب زویترین دەم پشکا ھەرێما کوردستانێ ل دویڤ وێ قانوونێ ئهوا وان بیێ کوردان پەسەند کری ب ھنێریت.
جڤاتا وەزیرێن ھەرێما کوردستانێ ھەروەسا بڕیار دایە ھەمی ھوربینی یێن دانوستاندنان د گەل ھەلویستێ بەرپرسێن بەغدا بەرامبەری ماف و شایستێن دارایی یێن ھەرێما کوردستانێ ل پەرلەمانێ ھەرێما کوردستانێ و ھەمی لایەنێن سیاسی و ڕایا گتشی بھێنە بەرچاڤ کرن.
د تەوەرێ دویێ یێ کومبوونا جڤاتا وەزیران دا، وەزیرێ دارای یێ ھەرێما کوردستانی ئاوات شێخ جەناب و وەزیرێ پلان دنانانێ دارا رەشید، تێبینێن پێدڤی سەبارەت ب داھات و مەزاختیان د کورتە ئینانا بودجا ھەرێمێ ل سالا ٢٠٢١ بەرچاڤکرن، و ئامادەکاریێن پێدڤی یێن وەزارەتێن پەیوەندیدار بۆ گەنگەشەکرنا پرۆژە قانوونا بودجا گشتی یا ھەرێما کوردستانێ، پشتی دانوستاندنان و پێکگوڕینا ھزر و بوچوونان، چەندین پێشنیار و ڕاسپاردێن پێدڤی بۆ رێکخستنا مەزاختنێ و باج و داھاتێن ھەرێما کوردستانێ ھاتنە بەرچاڤکرن.
سەبارەت بلندبوونا بھایێ دۆلاری و داکەفتنا دیناری ئیراقی، جڤاتا وەزیران وەزارەتێن پەیوەندیدار ڕاسپاردن کو ب ھویری دوڤچوونا بازاری بھێتە کرن، و سنوورەکی بۆ گرانکرنا بھایێ کەوپەلان ل بازاری بھێتە دانان، کو ھندەک کەسان دڤێت رەوشا نوکە بۆ بەرژوەندیێن تایبەتێن خۆ بكار بینن و بھایێ کەلوپەلان ل بازاری ل سەر وەلاتیان گران بکەن.
ل دووماھیێ جڤاتا وەزیرێن ھەرێما کوردستانێ ب ھەلکەفتا جەژنا سەرێ سالا نوى (کریسمس) پیرۆزباھیێن خۆ ل خەلکێ کوردستانێ و بتایبەت خوشک وبرایێن کریستان کرن