ئه‌ڤرو دكتور على ته‌ته‌ر پارێزگارێ دهۆكێ پێشوازیا لارس روناس بالیوزێ وه‌لاتێ سوێد ل عیراقا فیدرال وشاندێ دگه‌لدا كر.
دهه‌ڤدیتنه‌كێدا ب ئاماده‌بوونا شمعون شلیمون جێگرێ پارێزگارێ دهۆكێ و رێڤه‌به‌رێ گشتى یێ په‌روه‌ردێ و رێڤه‌به‌رێ گشتى یێ گه‌شه‌پێدانا جڤاكى به‌حسێ په‌وه‌ندیێن دوو قولى دناڤبه‌را گه‌لێ كورد وگه‌لێ سویدى و ره‌وشا ره‌ڤه‌ندا كورد ل وى وه‌لاتى و ره‌وشا سیاسى وئابورى و چاندنێ وگه‌شتوگوزارى و ره‌وشا ئاواره وپه‌نابه‌ران ل سنورێ پارێزگه‌ها دهۆكێ و رولێ رێكخراوێن سویدى ل ده‌ڤه‌رێ بو گه‌شه‌پێدانا مرۆڤایه‌تى و پروسا په‌روه‌ردێ وچاڤدێریا جڤاكى ب گشتى هاته كرن.
پاش رێڤه‌به‌رێ گشتى یێ په‌روه‌ردێ و رێڤه‌به‌رێ گشتى یێ گه‌شه‌پێدانا جڤاكى راپورت ل دور وان پرۆژان یێن رێكخراوێن (SKL) و (سیدا) پشته‌ڤانیێ لێ دكه‌ن به‌رچاڤكرن.
پارێزگارێ دهۆكێ خوشحالیا خو ب سه‌ره‌دانێ دیاركر ورولێ حكومه‌ت وگه‌لێ سویدى باش هه‌لسه‌نگاند به‌رامبه‌ر ئه‌و هاریكاریێن مروڤایه‌تى یێن به‌رده‌وام ب رێكا رێكخراوێن سویدى وه‌كو (SKL) و(سیدا) یا سویدى بو خه‌لكێ هه‌رێما كوردستانێ پێشكێشدكه‌ن وگوت: ئه‌ڤ هاریكاریه ناهێنه ژبیركرن وخواست كو ئاستێ هه‌مى جورێن په‌یوه‌ندیا خورتر لێبهێن وقه‌بارێ هاریكاریێن مرۆڤایه‌تى بو هه‌مى سه‌كته‌ران پتر لێ بهێن و پتر مفا ژسه‌ربورا حكومه‌تا سویدێ بهێته وه‌رگرتن.
