ئه‌ڤرو مه‌سرور بارزانى سه‌روكێ حكومه‌تا هه‌رێما كوردستانێ پێشوازى ل ئه‌سعه‌د ئه‌لعیدانى پارێزگه‌رێ به‌سرا كر.
د دیداره‌كێدا كو ئاراس حه‌بیب كه‌ریم ئه‌ندامێ جڤاتا نوینه‌رێن عیراقێ یێ ئاماده‌بوو، پارێزگه‌رێ به‌سرا ئاماژه ب وێ چه‌ندێ كر، كو گه‌له‌ك مفا ژ ئه‌زموونا سه‌ركه‌فتى یا هه‌رێما كوردستانێ دبیاڤێن ئاڤه‌دانكرنێ و پێشكێشگرنا خزمه‌تگوزاریان وه‌رگرتیه، گوت ژى ئه‌و گوتن راست نینن كو هه‌رێما كوردستانێ لسه‌ر حسابا به‌سرا و پارێزگه‌هێن دى یێن عیراقێ پێشكه‌فتیه.
پارێزگه‌رێ به‌سرا دووپاتكر كو حكومه‌تا عیراقێ، فیدرالییه نه ناڤه‌ندى یه، ژبه‌ر وێ چه‌ندێ پێدڤییه هه‌رێم و پارێزگه‌هێن دى یێن عیراقێ ب ره‌نگه‌كێ راسته‌قینه پشكداربن د ده‌ستهه‌لاتێ و بریاران دا و نابیت عیراق بره‌نگه‌كێ مه‌ركه‌زى بهێته برێڤه‌برن.
سه‌روكێ حكومه‌تێ ئاماده‌یا هه‌رێما كوردستانێ بو هه‌ر هاریكارى و هه‌ماهه‌نگیه‌كێ دگه‌ل پارێزگه‌ها به‌سرا و پارێزگه‌هێن دى یێن عیراقێ ده‌ربرى و دووپات ژى كر كو عیراق ژلایێ سامانێن مروڤى و سروشتى ڤه، وه‌لاته‌كێ زه‌نگینه و ئه‌گه‌ر حوكمرانى و برێڤه‌برنه‌كا باش هه‌بیت، ده‌رفه‌تا وێٍ چه‌ندێ یا هه، ببیته ئێك ژ وه‌لاتێن پێشكه‌فتى یێن ده‌ڤه‌رێ.
