ئەڤرۆ ل سەلاحەدین سەرۆک مەسعود بارزانی پێشوازی ل شاندەکا ھەڤپشک ژ نوینەر و کونسولێن وەلاتێن عەرەبی ل ھەولێرێ کر، کو پێکھاتبوون ژ بالیۆز نەزمی حزووری کونسولێ گشتیێ فەلەستینێ و عەمیدێ سلکێ دیپلۆماسی لە ھەرێمێ، د. عومەر ئەلکندەری کونسولێ گشتیێ کوەیتێ و ئەحمەد ئەلزاھری کونسولێ گشتیێ ئیماراتێ و محەمەد وەجیە حیجازی کونسولێ گشتیێ مسرێ و عەبدولرەحیم حەسەن رێکخەرێ کاروبارێن کونسولخانا شاھاتییا ئۆردنێ ل ھەولێرێ.
دیداره‌كێ دا كو ب ھەلکەفتا سەرێ سالا نوى ھاتبوو سازکرن، نوینەر و کونسولێن وەلاتێن عەرەبی ل ھەولێر سلاڤ و رێزێن سەرۆک و ئەمیر و شاھێن وەلاتێن خۆ گەھاندنە سەرۆک بازرانی، ھەروەسا سوپاسیا سەرۆک بازرانی و ھەرێما کوردستانێ کرن ژ بۆ وێ پەیوەندییا دێرین و ھەڤالیینیا وان ل گەل وەلاتێن عەربی.
شاندێ مێھڤان سوپاسسیا ھەرێما کوردستانێ كر کو د شەرێ دژی داعشێ دا مێھڤاندارییا سەدان ھزار ئاوارەیێن عەرەب کریە و رۆلێ ھێزێن پێشمەرگەی د شکاندنا داعشێ دا بلند دسه‌نگینین و دخوازین ئاریبشەیێن د ناڤبەرا ھەولێر و بەغدایێ دا ب دیالۆگێ بھێنە چارەسەرکرن.
ژلایێ خۆڤە سەرۆک بازرانی سوپاسییا شاندێ مێھڤان کر و راگەھاند: گەلێ کوردستانێ ھەردەم د بزاڤا وێ یەکێ دایە کو پەیوەندیێن ھەڤالینی ل گەل گەلێن ڤێ دەڤەرێ ھەبیت و بنەمایێن ئاشتی و پێکڤە ژیانێ بجھـ بینیت. دەربارەی پەیوەندیێن ھەولێر و بەغدایێ ژی سه‌روك بارزانی ئەو یەکە دووپاتکریە، کو پێدڤییە چارەسەری ب رێکا دیالۆگێ و ئاشتییانە بن و د چارچۆڤێ دەستور و رێگرتنێ ل پێگەھـ و قەوارەیێ ھەرێما کوردستانێ بن، ھەروەسا سەرۆک بارزانی جەخت ل بەرەفپێشبرنا پەیوەندیێن ھەرێم و وەلاتێن عەرەبی کریە.
