مەسروربارزانى سەروکێ حکومەتا هەرێما کوردستانێ پەیامەک ب هەلکەفتا هاتنا سەر سالا نوى یا زایینى پەیامەک راگەهاند ئەڤەژى دەقێ وێ یە:-
ب هەلکەفتا هاتنا سەرسالا نوى یا زایینى2021 گەرمترین پیروزباهیێ ل وەلاتیێن هەرێما کوردستانێ ب گشتى و پێشمەرگەیێن قارەمان و بنەمال و کەس و کارێن شەهیدان ب تایبەتى دکەم.
هیڤیدارم سالەکا پر خوشى و ئاشتى و ئارامى و دویماهیک هاتنا نەخوشى و قەیرانان بیت ل کوردستان و ل عیراق و جیهانێ
کوردستانیێن خوشتڤى
ددەمەکیدا دێ چینە دناڤ سالا نوى دا هەرێما کوردستانێ و جیهان ب گشتى سالەکا گەلەک دژوار دەربازکر ئەو ژى ژبەر بەلاڤبوونا ئێشا کورونایێ و لێکەفتێن ئابورى یێن دژوار و نەهنارتنا شایستێن دارایى یێن هەرێما کوردستانێ ژلایێ دەستهەلاتدارێن حکومەتا فیدرال ل بەغدا کو دئەنجامدا رەوشا دارایى یا دژوار و بارگرانیەکا مەزن ل سەر وەلاتیێن خوشتڤى یێن هەرێما کوردستانێ دروستبوو, نوکە کو ل سەر بودجا 2021ێ دگەل حکومەتا عیراقێ گەهشتینە رێککەفتنێ هیڤیدارم رێککەفتن وەکو خو بهێتە بجهئینان و لایەنێن سیاسى یێن عیراقێ چ جارێن دى رێکێ نەدەن ماف و شایستێن دارایى یێن خەلکێ کوردستانێ ببیتە کارتەکا فشارا سیاسى دژى خەلکێ مافێ وى هاتییە خوارن یێ کوردستانێ و دوپات دکەین ژى کو ئەم چ جارا دەستا ژ مافێن خو یێن دەستورى بەرنادەین.
گەلێ کوردستانێ خودان پرسەکا نەتەوەیى و نشتیمانى یە و قوربانییەکا مەزن پێخەمەت دایە و قەوارێ هەرێما کوردستانێ بەرهەمێ خەبات و تێکوشانا ب سەدان هزار شەهیدایە، پێدڤییە ئەم هەمى داکوکیێ لێبکەین و ب پارێزین، چونکە کەرامەت و سەربلندیا خەلکێ کوردستانێ گرێدایە ب هەبوون و بهێزبوونا ناسناما نشتیمانى و نەتەویى یا مە و رێزگرتن ل مافێن دستوریێن مە.
داخوازێ ژ هەمى هێز و لایەنێن سیاسى و خەلکێ خوراگرێ کوردستانێ دکەم هەمى جوداهیێ و ناکوکیێ بدەنە رەخەکى و بەرەڤانیێ ژ ئاخ و قەوارێ هەرێما کوردستانێ و دەستکەفتێن وێ بکەن وب ئێکگرتى رویبروى هەمى هێرشان بن و داکوکیێ ل مافێن رەوا و دەستوریێن خو بکەن.
پشتراستم ب ئێکرێزى و ئێکگرتنێ، دشێن هەمى قەیران و ئاستەنگان دەربازبکەین.
لڤێرە تەئکیدێ ل سەر بزاڤێن خو یێن بەردەوام بو درێژەدان ب چاکسازیێ و باشترکرنا ژیانا خەلکێ هەرێما کوردستانێ و سەروەریا قانونێ و دادپەروەری و سەقامگیرکرنا زێدەتر یا ئاساییش و ئارامیێ دکەین.
ئەم ب گەشبینى و ب ئومێد سەحدکەینە پاشەروژێ ب وێ هیڤیێ کو هەرێما کوردستانێ بگەهینیتە قوناغەکا نوى یا گەشەکرنێ و پر دەستکەفت و ئاڤەدانى و دویربیت ژ هەمى نەخوشى و رەوشەکا نەخواستى.
سالا نوى ل هەمى لایەکى پیروزبیت و کوردستان ژى هەردەم ب هێزترو سەرفرازتر و ئاڤەدان تربیت
مەسرور بارزانى
سەروکێ حکومەتا هەرێما کوردستانێ
31/12/2020
