ب هه‌لكه‌فتا وه‌غه‌ركرنا دكتور روژ نورى شاویس مه‌كته‌با سیاسی یا پارتی دیموكراتی كوردستان راگه‌هاندنه‌ك به‌لاڤكر
ب خه‌م و كوڤانه‌كا مه‌زن ڤه ده‌نگ و باسێ وه‌غه‌ركرنا هه‌ڤالێ تێكوشه‌ر دكتور روژ نورى شاوهیس ئه‌ندامێ مه‌كته‌با سیاسی یا پارتی رادگه‌هینین ئه‌ڤرو ب نه‌خوشیه‌كێ ل هه‌ولێرا پایته‌خت وه‌غه‌را دوماهیێ كر و ب ڤێ هه‌لكه‌فتێ به‌هى و سه‌ره‌خوشییێن خو پیشكێشى كه‌س و كار و تێكوشه‌رێن پارتى و سه‌روك بارزانی و ئه‌ندامێن مه‌كته‌با سیاسی و جڤاتا سه‌ركردایه‌تی و هه‌ڤالێن پارتی دكه‌ین
دكتور روژ نوری شاویس ل سالا 1947ژ خێزانه‌كا به‌رنیاس وخه‌باتكه‌ر ل باژێرێ سلێمانیێ ژ دایك بویه ل سالا 1962 بویه ئه‌ندامێ پارتى و په‌یوه‌ندی ب رێزێن پێشمه‌رگه‌ی كریه و ل سالا 1971كولیژا ئه‌ندازیاری ب دوماهیك ئینایه و باوه‌رنامێن ماسته‌ر و دكتورا د ئه‌ندازیاریا كاره‌بێ دا ل ئه‌لمانیا بده‌ستخوڤه ئیناینه و دهه‌مان ده‌م دا بویه ئه‌ندامێ لقێ پارتی ل ئه‌وروپا دكتور روژ نورى كه‌ساتیه‌كا ره‌وشه‌نبیر و به‌رنیاس بو ل شوره‌شا گولانێ و ب قه‌هره‌مانى پشكدارى د چه‌ندین داستان و به‌رخودانێن دیروكى دا كریه
وه‌ك ماموستا پشكدارى چه‌ندین خولێن سیاسی و ره‌وشه‌نبیری پێگه‌هاندنا كادران كریه و ل سالا 1983 بویه ئه‌ندامێ مه‌كته‌با سیاسی یا پارتی و ل 1987تا 1988 وه‌ك فه‌رماندێ له‌شكه‌ری پشكدارى د چه‌ندین شه‌ران دا كریه و فه‌رماندێ چه‌ندین شه‌رێن دژى رژێما به‌عسا داگیركه‌ر كریه ژ وانا داستانا خواكورك و كانی ماسێ و دێره‌لوك و بامه‌رنێ و ل شه‌رێ دژى تیرورستێن داعش وه‌ك فه‌رمانده‌یه‌كێ ئازا و چاڤ نه‌ترس رولێ گرنگ و كاریگه‌ر دناڤ سه‌نگه‌رێن به‌ره‌ڤانیێ دا گێرایه و ل ژیانا پارتایه‌تى و سیاسی و حكومی دا چه‌ندین به‌رپرسایه‌تی ئیخستینه ستویی خو و نوینه‌راتیا چه‌ندین شاندێن حزبی و حكومی كریه و ل سالا 1999ب سه‌روكێ جڤاتا نیشتیمانی یا كوردستانێ هاتیه هه‌لبژارتن و ل سالا 2003 بویه جێگرێ سه‌روك كومارێ عیراقێ و ل 2005 بویه جێگرێ جڤاتا وه‌زیرین عیراقێ و ل سالا 2010ل كونگری 13 ێ یێ پارتى بویه ئه‌ندامێ جڤاتا سه‌ركردایه‌تی و مه‌كته‌با سیاسی یا پارتی دیموكراتى كوردستان و ل سالا 2010میدالیا بارزانیی نه‌مر پێ هاتیه‌دان
دوباره به‌هى و سه‌ره‌خوشیین خو بو هه‌مى لایه‌كى دوپات دكه‌ین و جهێ هه‌ڤالێ وه‌غه‌ركرى دكتور روژ به‌هه‌شتا به‌رین بیت و خودێ سه‌ب رو هه‌دارێ بده‌ته هه‌مى لایه‌كى
انا لله وانا الیه راجعون
مه‌كته‌با سیاسی یا پارتی دیموكراتی كوردستان
پازده‌یى هه‌یڤا دوو دوهزار و بیست و ئێك
