نێچیرڤان بارزانى سه‌روكێ هه‌رێما كوردستانێ د په‌یامه‌كێ دا جه‌ژنا ژدایك بونا حه‌زره‌تێ مه‌سیح ل هه‌مى كریستیانێن كوردستانێ و عیراقێ و جیهانێ پیروز دكه‌ت و تێدا هاتیه:
ب هه‌لكه‌فتا روژا ژدایك بونا حه‌زره‌تێ مه‌سیح سلاڤێن خودێ لسه‌ربن پیروزباهیێن خو پێشكێشى خویشك و برایێن مه‌سیحى ل هه‌رێما كوردستانێ و عیراقێ و جیهانێ دكه‌م و دخوازم جه‌ژن و بێهنڤه‌دانه‌كا خوش و ئارام ببه‌ن، هیڤیدارم ئه‌ڤ جه‌ژنه ببیته جهێ ئێمناهى و ئاشتى و لێبورین و ئێك و دوو قه‌بیل كرنێ ل عیراقێ و ده‌ڤه‌رێ و جیهانێ و بو هه‌مى مروڤایه‌یتێ، بمخابنى ڤه ئه‌ڤ ساله ل هه‌رێما كوردستانێ وه‌كى هه‌مى جیهانێ ژى ژبه‌ر ره‌وشا نه‌خوشیا كورونایێ رێ و ره‌سمێن مه‌زن بو جه‌ژنێ ناهێنه ئه‌نجامدان به‌لێ بێ گومان بیره‌وه‌ریا ژدایك بونا حه‌زره‌تێ مه‌سیح ب مه‌زنى د دلێ مه هه‌میان دا دێ مینیت و ژ خودێ دخوازم جه‌ژنێن بهێت د سه‌قایه‌كێ خوش و باشتر دا بگێرین، كوردستان هه‌رده‌م لاندكا ئێمناهیێ و فره‌هى و پێكڤه ژیانا هه‌مى پێكهاته‌یان بوویه و مه هه‌میان پێكڤه روژێن سه‌خت و دژوار و ئالوزى و قه‌یران ده‌ربازكرینه و ب هه‌مان ره‌نگ دێ ئالوزى و قه‌یران و نه‌خوشیێن نوكه ژى ده‌رباز كه‌ین و پاشه‌روژه‌كا باشتر لبه‌ر سینگێ مه‌یه، دووباره جه‌ژنا ژدایك بونا حه‌زه‌رتێ مه‌سیح و سالا نوى یا زاینى ل هه‌مى كه‌سان پیروزبیت و هه‌ر سال ب خوشى بژین
نێچیرڤان بارزانى سه‌روكێ هه‌رێما كوردستانێ
24/12/2020
