ب هه‌لكه‌فتا 22 سالییا دامه‌زراندنا ده‌زگه‌هێ سه‌ته‌لایتا كوردستان، سه‌روك مه‌سعود بارزانى په‌یامه‌كا پیرۆزباهییێ پێشكێشى ڕێڤه‌به‌ر و كارمه‌ند و بینه‌رێن كوردستان تیڤى كر و ئه‌ڤه ژى ده‌قێ په‌یامێیه:
ب ناڤێ خودایێ مه‌زن و دلوڤان
به‌رێزان ڕێڤه‌به‌ر و سه‌رپه‌رشتیار و ستاف و كارمه‌ندێن ده‌زگه‌هێ سه‌ته‌لایتا كوردستان:
د 22 سالییا دامه‌زراندنا كوردستان تیڤى دا گه‌رمترین پیروزباهییان ل هه‌وه‌یێن خوشتڤى دكه‌م و هێڤییا به‌رده‌وامییێ و پێشكه‌فتنێن زێده‌تر بو هه‌وه دخوازم.
كه‌نالێ ئا‌سمانى یێ كوردستان تیڤى وه‌ك ئێكه‌مین ته‌له‌فزیونا ئاسمانییا كوردستانێ ، ژلایێ پێگیربوون ب ئه‌ته‌كێتێن نه‌ته‌وه‌یى و نیشتیمانى و گه‌هاندنا په‌یاما ئاشتیێ و پێكڤه‌ژیانێ و ده‌نگێ راستێ بزاڤا رزگاریخوازا خه‌لكێ مه ل به‌راهییا میدیا كوردستانێ بوو، و دڤى ئه‌ركى دا دویڤچوویێن ڕاستییێ و پیشه‌یبوونێ بوون.
نوكه كوردستان تیڤى و زاگروس تیڤى د چارچوڤێ ده‌زگه‌هێ سه‌ته‌لایتا كوردستان دا پێدڤییه به‌رده‌وام بن د گه‌هاندنا په‌یاما ڕاستا خه‌لكێ مه بو ڕایا گشتى و به‌لاڤكرنا هشیارییا نیشتیمانى و فه‌رهه‌نگا پێكڤه‌ژیانێ دناڤ خه‌لكى دا ، دڤێ رێكێ دا دئاست پێشكه‌فتنێ و گوهورینێن بله‌ز د وارێ میدیا و راگه‌هاندنێ دا بن، دهه‌مان ده‌م دا پێگیرى به‌ها و ئامانجا بلندا خه‌لكێ كوردستانێ بن ده‌ستخوشییێ ل هه‌وه دكه‌م و هێڤییا سه‌ركه‌فتنێ بۆهه‌وه دخوازم.
