ئه‌ڤرو جڤاتا وه‌زیرێن هه‌رێما كوردستانێ ب سه‌رپه‌رشتیا مه‌سرور بارزانى سه‌روكێ حكومه‌تا هه‌رێمێ كومبونا خو یا ئاسایى ئه‌نجامدا و دوو ته‌وه‌رێن گرنگ یێن گرێدایى ب بودجه‌یا هه‌رێما كوردستانێ ڤه و ئیداره‌كرنا خالێن سنورى یێن هه‌رێما كوردستانێ گه‌نگه‌شه‌كرن.
جڤاتا وەزیرێن ھەرێما کوردستانێ د كومبونا خو دا ھەردوو وەزارەتێن نافخۆ و پێشمەرگەیی راسپارد: کو ھێزەکا تایبەت و ھەڤپشک پێکبینن بۆ رێگریكرن ل ھەر زێده‌گاڤییه‌ك و سەرپێچییەکێ و کارەکێ نەقانونى ل هه‌مى خالێن سنۆریێن ھەرێما کوردستانێ و بجهئینانا قانون و رێکاران ل ڤان خالان بێ جوداھی. ئەڤ چەندە ژی د راگەھاندنا ئەڤرۆ یا جڤاتا وەزیرێن ھەرێما کوردستانێ ب سەرپەرشتییا مەسرور بارزانی سەرۆکێ حكومه‌تا هه‌رێمێ ئاماژە پێ ھاتییەکرن، ئێک ژ وان خالان ژی راسپاردنا ھەردوو وەزارەتێن نافخۆیی و پێشمەرگەی بوو کو ھێزەکا تایبەت و ھەڤپشک دروست بکەن و وان دەستھەلاتا قانوونی یا پێدڤی ھەبیت بۆ بجهئینانا قانونێ و بەرھنگاربوونا قاچاخچیان و کارێن نەقانونی ل هه‌مى خالێن سنوری بێ جوداھی.
ھەر د وێ راگەھاندنێ دا ھاتییە کو ئەڤ ھێزا ھەڤپشک دێ داکوکیێ بجهئینانا وان بریاران کەن کو بەری نوکە ھاتبوونە دان بۆ رێکخستنا گرێبەستا خزمەتگوزاری یا خالێن سنوری و دیارکرنا داھاتی ژ بۆ رایا گشتی.
